巴塞ＭＳＮ踩行油掃皇

猪拉多纳

另一支西甲班霸巴塞隆拿作客皇家蘇斯達，巴塞教練安歷基用成績證明自己可承接「地上最強」傳統，近期頻頻大炒對手，重現霸氣。美斯、尼馬大勇之餘，蘇亞雷斯亦於上輪聯賽歇冬前成功開齋，取得西甲首個入波，「MSN」組合全面大爆發，皇家蘇斯達雖有主場之利，但多位主力受傷無力招架，直取巴塞隆拿讓球客勝。

（now 632周一凌晨4時直播）

安歷基今季回巢教巴塞，曾備受質疑，尤其係連接輸畀皇馬及切爾達後，更一度有下台壓力。不過經過一段時間磨合，將帥合作已非常純熟，美斯重拾入球機器本色，近5場聯賽喪轟8球，加上蘇亞雷斯上仗亦喺聯賽開齋，「MSN」美斯、蘇亞雷斯及尼馬愈嚟愈夾，威力不亞於皇馬「BBC」鋒線。巴塞現時落後榜首皇馬1分，但踢多1場，根本再冇失分空間，必須踩行油直追。
莫天才黑氣滲入皇蘇

皇家蘇斯達季中搵嚟「足球天才」莫耶斯領軍，表現係就係有些少起色，但最弊莫帥嘅「黑氣」滲入球隊，射手卡路士韋拿、阿基列斯、中場蘇魯圖沙及艾路斯當度先後受傷。前三者今季合共貢獻咗10個聯賽入球，佔球隊總入球近6成，若然3人一齊缺陣，皇蘇邊有本錢入波。捱打之下，估計難逃輸波厄運，問題係輸幾多粒。巴塞過去兩季新年聯賽首仗都贏4比0，今仗屬大炒格，1.7倍讓球客勝真係執豆咁執。