拉素成肚火強爆拖連奴

猪拉多纳

今個周中勁多盃賽，阿King就推介一場直播波畀大家，就係意大利盃十六強，拖連奴主場對拉素，上季獲拉素豪使800萬歐元由山度士撬過嚟嘅21歲中場菲臘安達臣今季終於大騷身價，近五場入五球，今鋪拉素好可能都係靠佢搵食，平手盤撐拉素！

（now 633、660及TVB 13周四凌晨4時直播）

拉素日前喺意甲首都打吡戰作客羅馬竟然領先兩球被逼和2比2，入兩球嘅「羅馬王子」托迪仲要喺入波後攞起手機自拍，勁落拉素面子，拉素主席事後鬧爆托迪咁做好冇品。依家拉素上下當然好激氣，今場搵拖連奴嚟發洩就最啱！

其實拉素已經唔係第一次領先兩球被逼和，上個月對國米都試過，教練皮奧利今場肯定會提醒班兵咪再大意；好在對手拖連奴攻力唔強，前線攻擊手勁唔爭氣，隊中神射手竟然係中堅基歷克，真係笑大人個口呀！
蘇斯達6連細再追

拉素今季喺意甲入球數字僅次榜首嘅祖雲達斯，除咗前鋒菲臘佐積域同中場莫利係主力士哥拿外，最近仲彈出個巴西小將菲臘安達臣，呢位進攻中場2013年夏天以800萬歐元（約7,330萬港元）由山度士加盟，要知道意甲球隊都係莫財，拉素竟然出咁多錢買佢返嚟，就知佢非同小可。經過一季嘅適應期後，菲臘安達臣終於大爆發，近期頻頻入波，大大增加拉素贏波本錢，平手盤要得過！

今日仲有好多場西班牙盃十六強次回合，阿King有兩場心水，首先係皇家蘇斯達主場對維拉利爾，蘇斯達喺主帥莫耶斯領軍下守強攻弱，連續六場開細，今場一於再追！另一場係畢爾包主場迎戰切爾達，畢爾包近期入得又失得，大盤值得一博。