「謝四」上陣成疑 紅軍讓唔起維拉

猪拉多纳

(六)6 阿士東維拉 Vs 利物浦

謝拉特月初宣布季尾離開利物浦，外界均對佢帶住遺憾離開「紅軍」感到惋惜，不過對呢位孭咗球隊十幾年嘅「神奇隊長」嚟講，呢個決定反而令佢釋懷，近兩場都踢得生猛咗，只可惜天意弄人，表現好咗但就拉傷腿筋，今場作客阿士東維拉上陣成疑。維拉攻擊力曳，但防守就唔係人咁品，受讓抵捧。

（now 623周六晚11時直播）

除咗因為謝拉特決定離隊令佢放開包袱、享受喺「紅軍」嘅每一分鐘外，領隊羅渣士搵佢踢番攻中亦係「謝四」翻生嘅另一個原因，上場作客新特蘭佢喺前場帶住菲臘比古天奴、拿沙馬高域、波連尼等一班後生仔不斷製造攻勢，可惜佢哋把握力麻麻先搞到入得1粒，去到下半場「謝四」因傷被換走，隊波即刻冇咁sharp醒，最尾保持1比0勝局實屬好彩。
維拉近3主場零失波

利物浦嚟緊會喺英聯盃4強對戰車路士，為穩陣起見，今場作客維拉或唔會派謝拉特上陣，雖然「紅軍」有叉足電嘅史達寧回歸，不過冇咗謝拉特呢位精神領袖，史杜列治又未有咁快復出，對手維拉防守力強，近3仗主場均一球不失，「紅軍」隨時好似上半季主場對維拉咁，久攻不下，然後畀維拉偷雞入波，讓球主勝捧得過。