日本讓主定過抬酋

猪拉多纳

本田變銀狐進入「戰鬥Mode」

亞洲盃8強戰繼續廝殺，日本今日喺悉尼對阿聯酋，一於追「讓球主勝」。雖然日本嘅表現唔算好霸氣，不過佢哋嘅攻擊重心已經進入「戰鬥Mode」，連續3場入波嘅本田圭佑更加將金毛染成銀髮，擺明要搶鏡做主角，撐佢就唔使顧慮咁多博「讓主」啦！

（now671台周五下午5:30直播）

日本分組賽雖然3戰全勝以D組首名出線，但感覺上未十足上力，入咗3球嘅本田圭佑有兩球來自12碼，可能佢自己都Feel到狀態唔算好Fit，完成分組賽後搵專人幫佢由金髮染成銀髮，希望變身「銀狐」咬瓜對手。
香川為做隊長搏命 阿聯酋近3戰都失波

除咗本田，香川真司得到網球王子錦織圭打氣後，對住約旦入波結束8場國際賽入球荒，長谷部誠知佢近期信心麻麻，爆響口話準備搵佢接任做隊長，試問香川真司點會唔搏？而且上場交出助攻嘅超級秘密武器武藤嘉紀，預告會有更好表現，使乜怕日本入唔到波？

雖然日本有森重真人可能要帶傷上陣，不過門神川島永嗣喺標準列治失去正選位置後，大打爭氣波連續3場保持不失，連偶像組合9nine嘅人氣成員川島海荷都叫佢「奸爸爹」幫日本攞冠軍，全國齊撐肯定士氣一流。

對家阿聯酋嘅入球能力雖然唔差，弊在近3場都有失波，加上同日本一樣鍾意玩地面戰，人腳輸蝕好難搵着數喎！
盤路解碼

日本連續3場開半勝全勝。