馬拉加唔用Sam哥

猪拉多纳

平手捧華倫好過

西甲今晚戲碼唔錯，馬拉加喺主場對華倫西亞，平手都要唔過，因為馬拉加教練查維加西亞已經亂晒龍，無厘頭重用過晒氣嘅喀麥隆門將卡文尼不特止，又企硬唔畀墨西哥「Sam哥」奧祖亞轉會，感覺勁迷失，我就唔撐佢啦！（開賽時間：周二凌晨3:45）
卡文尼多甩漏

雖然馬拉加喺聯賽榜排名唔算差，但其實連盃賽已連續6場不勝，前線更加死晒火，博佢哋反彈真係唔容易。最奇怪嘅係，馬拉加教練查維加西亞唔知發咩神經，堅持重用連喀麥隆國家隊都唔預佢踢非國盃嘅卡文尼，搞到失球數字高企，有時睇見佢排嘅陣真係火都嚟。

相反，新加盟嘅奧祖亞淨係可以喺西班牙盃上陣，6戰失6球，同佢應有水平有段距離，搞到馬拉加8強出局，鬼咩，查維加西亞唔用佢，又同高層講唔會畀佢走，結果累人累己，就算華倫有前鋒皮亞堤同後衞巴拿根未徹底傷愈，中場菲侯利踢緊非國盃，平手始終冇蝕底。