光輝傷停多 悉尼攞威良機？

猪拉多纳

除咗噴射機對獅吼外，今周仲有兩場澳職波直播，包括珀斯光輝對FC悉尼，同埋西悉尼流浪者鬥威靈頓鳳凰。

珀斯光輝星期六主場迎戰FC悉尼，雖然佢哋排名比對手較高，但有中場羅斯頓格菲斯停賽，又有靴斯、尼高斯等傷兵，相反對家FC悉尼就收到好消息，中場安東尼斯同後衞懷奧雙雙復出，加上今季作客戰績可人，除咗係澳職唯一作客不敗之師（3勝4和）外，仲係作客防守力至強隊伍，想知FC悉尼可唔可以終止近3次喺珀斯光輝地頭不勝嘅紀錄？到時記得留意喇。
流浪者周日迎戰鳳凰

講衰波，相信今季冇人會比得上西悉尼流浪者，呢支上屆澳職季後賽亞軍得主今季表現慘不忍睹，最羞家嘅係佢哋仲未喺聯賽開齋（4和9負），目前正在榜尾掙扎，名副其實衰到貼地。佢哋仲係澳職火力至弱嗰隊，難怪喺今個星期日喺主場鬥威靈頓鳳凰賽前被人睇低一線，流浪者今仗有澳洲射手杜米祖歷、守將史柏拉洛域歸隊，即管睇吓佢哋會否知恥近乎勇，對威靈頓鳳凰做番齣好戲。
本周澳職直播精選

周五 4:40pm•紐卡素噴射機 Vs 布里斯班獅吼

周六 6:30pm•珀斯光輝 Vs FC悉尼

周日 2:00pm•西悉尼流浪者 Vs 威靈頓鳳凰