拖肥紅軍獻大Show

猪拉多纳

謝四最後一場默郡打吡

打吡夜謝拉特做主角！今晚打吡之夜，頭場先有北倫敦打吡熱刺主場火併阿仙奴，跟住去到西甲就有馬德里打吡，馬德里體育會硬撼皇家馬德里，但係好戲在後頭，深宵嘅默西賽德郡打吡可能係利物浦「神奇隊長」謝拉特最後一場打吡戰，各位球迷唔睇就走寶嘞！紅軍今場作客「拖肥糖」愛華頓，雖然兩軍今季嘅攻力都大不如前，不過嚟到打吡戰大家都會加多兩錢肉緊，誓要打冧死敵，科娜今場撐大盤！

（now 621周日凌晨1時30分直播）

除非利物浦同愛華頓之後會喺歐霸盃碰頭，否則今場就會係謝拉特第33次、亦係最後一次默西賽德郡打吡戰，意義咁重大，紅軍上下梗係想留番個美好回憶畀佢哋嘅傳奇隊長喇！

紅軍季初勁跌Watt，但自從謝拉特宣布季尾離隊後，隊波開始有復甦迹象，除咗係因為「謝四」終於可以放下孭咗十幾年嘅重擔，踢得放咗之外，相信唔多唔少都因為呢個決定激起其他球員嘅鬥心，一班隊友都踢得搏命咗，希望為隊長做番啲嘢，就好似上場英足盃作客保頓，佐敦軒達臣、菲臘比古天奴等人秉承咗「神奇隊長」打不死精神，喺劣勢下永不放棄，最尾臨完場連入兩粒反勝。
近七對碰五次開大

不過，利物浦今場隱憂係防中盧卡斯未知趕唔趕得切傷愈復出，冇咗呢位「英超攔截王」，紅軍中場防守力大幅下降，今場惟有以攻代守，靠「進攻三寶」史杜列治、菲臘比古天奴同史達寧狂攻對方防線。

愛華頓近況雖然唔係好掂，火力唔見得超強，但見到人人都將焦點放喺「謝四」身上，「拖肥糖」梗係唔「鋸」，主帥馬天尼斯賽前講明今場係佢哋主場，愛華頓先係主角，又點可以畀「謝四」搶晒風頭？兩隊每次碰頭例牌踢到飛沙劈石，近七次對戰有五次開大盤，今場一於再追！

另外，「謝四」最近兩次對「拖肥」都係「首名入球」，今仗隨時又有士哥留番個美好回憶。