曼城誓炒病虎洩憤

猪拉多纳

(六)14 阿士東維拉 Vs 車路士

曼城近期連場失分，但全部對住硬嘢情有可原，今晚主場迎戰「病虎」侯城，有法國中場拿斯尼及時復出，令進攻組織更加流暢，為搶分爭標勢必大炒「病虎」洩憤，讓球主客和要讓到兩球，照撐讓球主勝。

（now 622周六晚11時直播）

曼城近三場聯賽僅得兩和一負，但睇番對手係一哥車路士、阿仙奴同愛華頓等硬嘢，中場核心耶耶托尼及新援韋菲特邦尼又出征非國盃而缺陣，好彩傷咗一排嘅中場拿斯尼已可復出，佢創造力強之餘，兼有神出鬼沒嘅後上入楔，可幫輕大衞施華嘅進攻組織，現時佢哋落後車仔五分，為爭標今仗實在不容再失。相反，侯城已連輸四場，仲一球都入唔到，季初表現唔錯嘅前鋒謝拉域同艾保靴南迪斯踢到冇晒信心，令主帥布魯士聞到魷魚香，加上羅仙尼亞、占士謝斯達同迪亞美仍未好番，呢隻「病虎」難頂曼城狂轟猛炸，「藍月亮」有力大勝一場。