尼馬牛一巴塞派壽包

猪拉多纳

巴塞隆拿今晚喺西甲造訪畢爾包，雖然話「地上最強」近3季聯賽造訪畢爾包只係得2和1負成績，不過各位「巴塞躉」唔使擔心，事關畢爾包今季轉咗竇口之後未好過，巴塞有大勇嘅「壽星公」尼馬拍住叉足電嘅美斯攻堅，有望喺畢爾包地頭威番鋪，1.8倍「讓客」信得過。

（now632台周一凌晨4:00直播）
畢爾包新場唔老利

最近巴塞喺聯賽同西盃3度造低馬體會，士氣同狀態好到不得了，當中尼馬近3仗入5球，上周四先度過23歲「牛一」嘅佢，賽前仲帶埋「巴塞躉」囝囝大衞盧卡齊齊註冊做巴塞會員，咁高興，今晚梗係想用入波「慶生」啦！至於日前同屋企人去咗滑雪嘅美斯，近期轉咗做策劃，間唔中先隊番一、兩粒，但威脅一樣好大。再講，巴塞上仗險勝維拉利爾3:2，守將碧基有個低級犯錯搞到失波，好在球隊最終反勝，相信碧基今仗實會醒醒定定！

對家畢爾包近4仗不敗，西盃亦進身8強，士氣應該唔錯，不過佢哋今季轉咗主場後只係贏過3場咁大把，對上一次贏波已經係兩個幾月前嘅事。何況佢哋個中場伊度拉斯比膝傷缺陣，米基聖荷西焗住客串中場，以巴塞近8仗場均攻入起碼3球嘅強勁走勢，似係會輸大鑊喎！