熱刺「客」窒利物浦

猪拉多纳

幼獅互片 哈利仔勇過史達寧

三獅新星借「搶4大戰」上位！英超競爭激烈，搞到忽略青訓，為人詬病，但其實今夜碰頭嘅利物浦同熱刺，都有重用三獅新星，好似史達寧同哈利卡尼都係陣中主力，最近紅軍仲彈出個佐敦伊比。今場係爭前4嘅關鍵大戰，全英矚目，呢3大新星今場為上位勢爆暗戰！不過3人之中，呢期肯定係「哈利仔」最勇，簡直弗到勒唔住，熱刺作客紅軍受讓平半未驚過，下盤值捧！

（now 621周三凌晨4時直播）
佐敦伊比太新嫩

利物浦呢幾年成為英格蘭大戶，史杜列治、佐敦軒達臣等人都係英軍主力。不過講到大紅人，就肯定係年僅20歲嘅史達寧，今季成為紅軍同英軍絕對主力。但呢位2014年歐洲金童人紅即囂，唔單止同紅軍傾續約扭計，大跳草裙舞，仲大牌到試過喺歐國盃外圍賽，同英格蘭領隊鶴臣呻攰話唔想踢，畀球迷插爆。

其實史達寧有排都未到世界級，首先係要改吓佢嘅態度，佢雖然又快又扭得，但就上腳太多，以為自己係超級巨星，一味自已去晒，唔同隊友做配合，睇嚟「史獨」稱號似乎更啱佢多啲；第二就係把握力差，上場對愛華頓佢唔係冇機會入波，但係射得曳，搞到紅軍未能取勝。史杜列治傷愈復出後狀態未起，今場紅軍仲要靠史達寧入波就真係危危地！另一位19歲嘅前鋒佐敦伊比上場打吡戰首次擔正即有好表現，更被選為賽事最佳球員，獲領隊羅渣士同隊長謝拉特激讚，呢位新星同史達寧一樣係速度腳法兼備，但身形更大隻過史達寧，不過佐敦伊比始終太新嫩，暫時火候未夠，紅軍今場難靠佢贏波。
紅軍主力踢到殘

熱刺呢邊都有個熱爆新星哈利卡尼，呢位21歲前鋒上場梅開二度幫球隊反勝死敵阿仙奴，今季各項賽事加埋已經入咗22球，連「兵工廠」領隊雲格都輸得心服口服，話「三獅兵團」一定要召佢入伍。「哈利仔」勁到畀人捧到上天，更重要嘅係佢夠忠心，最近同熱刺續咗約，依家可以專心踢好波，史達寧學嘢喇！

利物浦呢期賽程頻密，英聯盃、英足盃同英超賽事一場接一場，一班主力踢到殘，反觀熱刺冇踢得咁密，贏埋死敵更士氣大振，又有個大勇嘅「哈利仔」，紅軍要贏難啲囉！
哈利卡尼

年齡：21

身高：1米88

球會：熱刺

今季聯賽入球：12 U21

上陣：10次
史達寧

年齡：20

身高：1米70

球會：利物浦

今季聯賽入球：5

國家隊上陣：13次
佐敦伊比

年齡：19

身高：1米76

球會：利物浦

今季聯賽入球：0

U20上陣：2次