榜首大戰打比郡唔怕茅

猪拉多纳

今季英冠係般尼茅夫、打比郡同米杜士堡三頭馬車之爭，究竟邊兩隊可以攞到直接升班資格？真係好難講！周三凌晨就嚟場榜首大戰，「一哥」般尼茅夫主場迎戰「二哥」打比郡，無論睇狀態定往績都係打比郡秤先，今場受讓捧得過！

（周三凌晨3時45分開賽）

上季爭一步就升班成功嘅打比郡今季捲土重來，積極增兵，喺季初就分別從利物浦同皇馬兩支豪門借入潛質新星佐敦伊比及馬斯卡利，為球隊注入活力，喺上半季搶下唔少分數。打比郡食過翻尋味，見到借人咁成功，去到1月再借入連格、湯馬士恩斯兩大英格蘭新星，以填補佐敦伊比離隊嘅空缺，又從阿士東維拉借得前鋒戴倫賓特，呢位31歲射手近年雖然跌Watt，但踢英冠仍然綽綽有餘。依家打比郡嘅陣容實力可以話係英冠最強，再加上防守力比般尼茅夫更強，近4場全勝之餘更只係失咗1球，而且近4次對住般尼茅夫取得3勝1和佳績，所以話般尼茅夫今仗主場出戰都冇甜頭呀！
米堡「-1」炸散黑池

至於「三哥」米堡就梗係趁鷸蚌相爭而漁人得利喇，將會作客榜尾嘅黑池，米堡狀態弗到漏，一月戰績彪炳，喺聯賽4戰贏咗3場，領隊卡蘭卡同前鋒李爾湯連更因而分別成為該月最佳領隊同球員，今場對住冇狀態、冇士氣嘅黑池，讓球客勝咪走寶！