洛達咸搶分護級打甩比

猪拉多纳

幾支上周末出戰英足盃嘅英冠球隊今晚進行補賽，打比郡喺英足盃主場踢少個嘅情況下被雷丁淘汰，體力、士氣皆受損，今次作客對住仲要搶分護級嘅洛達咸冇甜頭，打比郡讓波必捧讓球主勝。

（周三凌晨3時45分開賽）

打比郡上場英足盃對雷丁有守將禾諾克上半場領紅牌被逐，整個下半場要十人應戰，結果戰至末段被對手耶高保攻入致勝一球落敗，相隔三日作客再戰，體力上蝕晒章。洛達咸現時只比尾三嘅米禾爾多三分，仲未擺脫降班威脅，佢哋對上兩場主場聯賽先後擊敗保頓及葉士域治，表現不俗，養精蓄銳之下有力搶分，受讓捧得過。
韋根後防穿窿 雷丁可捧

另外兩場賽事，布力般流浪喺英足盃反勝英超史篤城贏盡掌聲，不過今次作客未必惡得出樣，卡迪夫城門將大衞馬素爾復出，防線表現穩定咗好多，捧細盤。最後雷丁主場對韋根，韋根最近七場聯賽未贏過，而且對上兩場都要失三球，防線穿晒窿，捧雷丁主W。