伊巴謙停賽 摩納哥偷到雞

猪拉多纳

法甲今周壓軸戰由摩納哥主場鬥巴黎聖日耳門（PSG），摩納哥上周歐聯技術性擊倒英超強敵阿仙奴，球員信心爆晒棚，撞正PSG今仗有伊巴謙莫域坐波監，主場出擊不落下風，摩納哥受讓平半必捧下盤。

（TVB 302周一凌晨4時直播）

摩納哥上場歐聯踢出今季代表作，憑穩健防守及快速反擊以3比1擊敗阿仙奴。摩納哥能夠搞到阿仙奴一班星級前鋒冇啖好食絕非偶然，事關佢哋早前曾經保持連續14場比賽冇失波，防守力之強可見一斑。球隊對上5場主場聯賽都冇失波，包括擊敗馬賽、打和里昂等硬仗，加埋老將貝碧托夫喺前線衝鋒陷陣，演出充滿說服力。
PSG作客水準飄忽

PSG上周中唔使踢歐聯，體力上比主隊佔優，可惜王牌前鋒伊巴謙莫域喺早前對卡昂嘅聯賽中嚴重犯規，被秋後算帳停賽兩仗，今場及嚟緊周中法足盃再對摩納哥都無法上陣，對進攻一定有影響，何況佢哋今季作客演出唔算太穩定，最近五場作客聯賽只得一勝，要讓波有危機。