(六)72 西維爾VS巴塞隆拿

猪拉多纳

巴塞着火速食西維爾

時間證明一切，有料之人最終都會證明自己嘅實力！執教初期備受質疑嘅巴塞隆拿教頭安歷基以超高得勝率證明自己夠班帶巴塞，而孭住7500萬鎊身價嘅蘇亞雷斯亦愈嚟愈弗，成為球隊不可或缺嘅主力，今晚呢支西甲一哥將會作客西維爾，客勝略嫌過熱，一於博巴塞半場就搞掂對手！

（now 632周日凌晨2時直播）

數據冇得呃人嘅，巴塞今季踢咗46場正式賽事，贏咗39場，得勝率高達85%，創下巴塞近7季以來最高勝率，巔峰時期嘅巴塞喺哥迪奧拿率領下，46場波得勝率亦只係得大約76%，可見今季嘅巴塞真係勁到爆！喺安歷基嘅調教下，火力超強嘅巴塞連防守都勁埋，今場作客西維爾，安帥勢要取得領軍第40場勝仗！
美斯首循環食大三元

其實西維爾絕對係巴塞嘅私房菜，近6次對戰巴塞錄得全敗，而美斯每逢對住西維爾，都特別容易「起筷」，截至今季之前，呢位巴塞球王已經18次攻破西維爾大門，而今季首循環碰頭，美斯更係食出大三元，真係順到冇朋友。美斯今季仲得到兩位好拍檔蘇亞雷斯同尼馬幫手，其中「阿蘇」近期頻頻士哥，成功令批評者收聲，證明自己嘅身價，西維爾今晚想頂到半場，睇怕都好難囉！