QPR打吡戰揸大膽車

猪拉多纳

(日)20 昆士柏流浪 VS 車路士

今晚英超早場都有場打吡大戰，就係昆士柏流浪（QPR）主場對車路士嘅「倫敦打吡」，力爭護級嘅QPR有理冇理都要焗攻車仔，唔搏等幾時？車仔雖然有鋒霸迪亞高哥斯達因傷缺陣，不過王牌夏薩特狀態弗爆，今場仲要係佢英超第100場，梗係要省靚個招牌，1.68倍嘅大盤有買趁早嘞！

（now 621周日晚8時30分直播）

以26分排喺第18位嘅QPR近兩場上晒身，作客渣到痹嘅佢哋竟然兩場作客攞到4分，當中一場仲要係大勝西布朗4比1，果然嚟到季尾呢啲護級球隊真係超級惡！QPR大爆發，部分都要歸功於馬菲菲臘斯，呢位24歲翼鋒勁到拍得住巴塞球王美斯呀！點解咁講？馬菲菲臘斯踏入2015年勁爆seed，迄今交出7個助攻，喺歐洲5大聯賽入面僅次美斯嘅8次，認真犀飛利。再加上首席射手查理柯士甸近期翻生，連續兩場有波入，為搶分對住車仔都要豁出去搶攻呀！
車路士夏薩特英超百戰

雖然QPR咁大無畏主攻車仔，不過講真，以QPR嘅防守級數，隨時前面入1粒，後面失番兩粒。車仔領隊莫連奴喺賽前記招就話射手「迪哥」因腿筋傷患，至少抖1個月，不過球隊仲有雷米頂上，呢位前QPR射手近兩場都攻入致勝士哥幫車仔贏波。仲有各位唔好忘記車仔王牌夏薩特，呢架「黃金戰車」冇咗「迪哥」事小，冇咗「夏神」先事大，「夏神」今季入咗12球交出7助攻，今晚佢英超百戰，QPR好難頂得住囉！