拿臣父子檔希爾星堡獻細

猪拉多纳

瑞典傳奇名將軒歷拿臣今季由科根堡過檔至希爾星堡，雖然希爾星堡喺佢領軍下於瑞超仲未開齋，不過球隊喺正選門將受傷嘅情況下，兩場聯賽都能保持不失球，都算有交代，今晚希爾星堡作客咸史達斯，一於博希爾星堡嘅防守頂得住對方，捧細！

（周日晚9時開賽）
囝囝佐敦拿臣唔射得

上季瑞超升班球隊科根堡嘅人腳實力可以話係咁多隊之中最曳，不過軒歷拿臣都可以化腐朽為神奇，帶領科根堡護級成功，令唔少球隊都想搵拿臣過檔，最尾拿臣選擇咗希爾星堡，同効力該隊嘅囝囝佐敦拿臣拍住上。由於前鋒達爾保受傷，佐敦拿臣近兩場都有得擔正踢前鋒，可惜表現唔掂，搞到希爾星堡兩場都冇波入。

好在攻力唔掂嘅希爾星堡有防守搭夠，首輪賽事球隊兩名正副選門將柏斯杜域斯基同柏漢臣都因傷缺陣，軒歷拿臣獨具慧眼，搵嚟喺球會負責雜務、同時亦係兼職守門員嘅42歲丹尼爾安達臣頂上，結果成功保持清白，成為一時佳話。柏漢臣上場已經傷愈復出，希爾星堡防守更見穩健，今場細盤值捧。