紅高達劍指打吡王 火併阿「虎」路

猪拉多纳

史上第169次曼市打吡戰，今晚喺奧脫福球場上演。自2013年起，曼聯連續4次不敵曼城，但朗尼最近進攻數據全面提升，有機會成為新人類兼打吡王，佢會駕駛專用「紅色高達」，對抗阿古路嘅「藍老虎」，目的係結束「2年戰爭」呢場慘烈戰役，重新奪取曼市統治權！

now621 今晚11:00直播

曼聯近兩年被曼城壓住打，到底邊隊能夠勝出呢場重要戰役，得到爭奪聯賽亞軍嘅先機，就要睇「新人類」幾時誕生。自從費格遜榮休前最後一次打吡戰輸波，原來曼聯對曼城已4連敗，的確需要有人進化做新人類，駕駛「紅色高達」扭轉戰爭形勢。
曼聯交手4連敗

最有機會完成進化嘅，睇怕係朗尼，佢已經為曼聯攻入230球，有機會打破卜比查爾頓嘅249球紀錄，成為隊史首席射手。最近朗尼回歸前鋒位置，重拾新人類觸覺，佢喺打沉利物浦前喺更衣室仲發表過丘吉爾式演講激勵隊友，發揮入波之外嘅才能。

朗尼係曼市打吡戰歷來入球最多球員，累積11球，賽前佢放風話，開戰前會再次發表激情演講，領軍洗脫連續4次不敵曼城恥辱：「當你係曼聯球員，任何時候都會想贏打吡戰，我希望曼聯擁躉喺星期一朝早，可以有寸曼城球迷嘅理由。」
Kun連續6戰冇士哥

至於死對頭曼城都有潛在新人類阿古路孭飛，雖然Kun連續6場食白果，但一樣有超乎常人嘅破門感官。佢唔止有信心用「藍老虎」打勝仗，甚至覺得冠軍希望仲未幻滅：「足球世界上，一切都有可能。」到底邊個能夠進化成功，大家今晚自己睇啦！