歐聯8強首回合 馬體會推翻皇朝

猪拉多纳

文迪蘇傑復出 「土匪」作亂

今晚歐聯8強首回合上演最火爆西班牙首都打吡，由衞冕嘅皇馬作客火併上屆亞軍馬體會，雙方一向勢成水火，皇馬王牌C朗雖然弗到勒唔住，但馬體會箭頭文迪蘇傑好番趕及披甲，將貫徹球隊賴以成功嘅堅勇悍嘅「土匪戰術」，今季6度鬥皇馬未曾輸過，極有格食格味道，今次主場出擊，誓要報番上屆決賽一箭之仇，讓球主客和皇馬作客讓波，斯維強捧讓球主勝。

（有線61、64、201及203台周三凌晨2時45分直播）
銀河艦隊 欠鐵血防中

自國家打吡不敵巴塞後，皇馬的確強勢反彈，連贏3場狂轟14球，王牌C朗包辦當中7球，真係弗到冇朋友，上仗對伊巴半力迎戰之餘，踢到中段亦收起馬些路、沙治奧拉莫斯同莫迪歷3大主力，為呢場歐聯8強戰留力。馬體會反而喺日前聯賽只能逼和馬拉加，「王子」費蘭度托利斯更誤入職業生涯首個烏龍波，照咁睇好似皇馬秤先少少喎。不過斯維收到風，「床單兵團」馬體會箭頭文迪蘇傑經過兩輪休息後已經康復，鐵定今仗可以復出取代費托上陣，咁又唔同講法。

眾所周知皇馬中場欠缺鐵血防中，莫迪歷、卻奧斯、艾斯高都係技術型球員，伊拿拉文迪同基迪拉又不受重用，對於縮後防守嘅球隊就畀你慢慢搓啫，但撞正主打「土匪戰術」嘅馬體會就比下去，由箭頭文迪蘇傑為首，配合佐治高基、基沙文、基比、阿達杜倫等，個個都好打劫搶錢咁，於前場不惜氣力狂奔攔截，皇馬班「瓷器」邊夠呢班「土匪」搶呀，格食格唔係冇原因，難怪今季喺聯賽、西超盃及西盃6度交鋒，馬體會錄得4勝2和，「銀河艦隊」見親佢哋都怕怕。
衞冕魔咒 撞正格食格

查實上屆決賽馬體會一路領先，去到補時階段先畀皇馬中堅沙治奧拉莫斯追平，加上體力不繼，埋下加時慘敗1比4嘅伏線，錯過首次奪標機會已經夠慘，仲睇住死敵完成歐聯10冠偉業，真係慘上加慘，此仇不報非君子，令佢哋對今仗更有飢渴感。況且自歐聯改制後從未有球隊可蟬聯冠軍，樣樣嘢都對「銀河艦隊」極不利，讓球主客和仲要讓一球，識揀梗係揀受讓嘅馬體會啦！