金絲雀博直升起筷

猪拉多纳

紅牛否認收購列斯聯洩氣

英超冠軍之爭差唔到塵埃落定，車路士極大機會奪冠，如果想睇緊張刺激嘅冠軍爭霸戰，低一級嘅英冠係唔錯嘅選擇。今季英冠前列鬥得激烈，有四隊爭緊兩個直接升班資格，包括靜雞雞殺到上第二嘅「金絲雀」諾域治，近四場全勝嘅「金絲雀」今晚作客近期失波超多嘅列斯聯，有望大炒一場！

（周三凌晨2時45分開賽）
「尼爾頂尼爾」突然升第二

被視為升班大熱嘅諾域治開季成績冇預期咁好，由第12輪開始戰績更大插水，由榜首位置一路插到第11位，領隊尼爾阿當終於都喺今年初引咎辭職，球會管理層決定「尼爾頂尼爾」，博一鋪請嚟蘇超咸美頓嘅隊長兼領隊阿歷士尼爾領軍，結果換帥後嘅「金絲雀」愈戰愈勇，依家仲升番上第二位，連英冠由原本只屬般尼茅夫、屈福特同米杜士堡嘅三頭車馬之爭，變成「四國咁亂」。

「金絲雀」依家勢頭咁好，作客列斯聯要贏的確唔難，之前盛傳列斯聯獲紅牛集團收購，點知係一場歡喜一場空，紅牛發聲明否認呢單交易，受到事件影響，本身狀態唔錯嘅列斯聯近三場突然勁跌Watt，三場全敗之餘更共失九球，今場無論係大盤定讓球客勝都追得過。