巴塞MSN狂爆華倫

猪拉多纳

(六)28 巴塞隆拿 Vs 華倫西亞

剛於歐聯贏得清風送爽嘅巴塞，今晚西甲返主場迎戰四哥華倫西亞。巴塞射手蘇亞雷斯今季生性唔咬人，仲變身「豪門屠夫」專斬勁旅，上輪失分嘅「地上最強」為保一哥位置，今仗對華倫唔會再大意，直取讓球主勝。

（now 632周六晚10時直播）
蘇亞雷斯做「豪門屠夫」

蘇亞雷斯因喺去夏世盃咬人惡行成為眾矢之的，今季轉投巴塞亦不被睇好，不過阿蘇願意放下身段，主動融入以美斯為首嘅進攻體系，不斷於前線左穿右插為隊友開路，美斯同尼馬見佢咁識做，當然投桃報李，令MSN組合愈來愈恐怖。蘇亞雷斯來到巴塞後生性踢好波，尤其對強隊分外落力，先後對皇馬、曼城、馬體會，以及啱啱於歐聯8強首回合作客以3比1輕取聖日耳門都有士哥，着晒火堪稱「豪門屠夫」，撞正華倫西亞有前鋒皮亞堤及後衞荷西加耶養傷上陣成疑，實力削弱，又係阿蘇表演好時機，而且吸取咗上輪領先兩粒都畀西維爾逼和嘅教訓，現只領先皇馬2分嘅巴塞，今仗必然搏到盡，力爭入多幾粒鎖定勝局，讓球主勝咪錯過。