學生隊作客搶W迎新帥

猪拉多纳

南美自由盃第7組賽事，厄瓜多爾球隊SC巴斯隆拿喺主場迎戰阿根廷嘅學生隊，排阿甲第十九位嘅學生隊最近換上新帥，就係前國際米蘭前鋒迪亞高米列圖嘅細佬米列圖。雖然未知「細米」教波有冇料到，不過喺「新帥效應」下，對住實力較差嘅SC巴斯隆拿，學生隊有望全取三分！

（周三早上9時45分開賽）

已經35歲嘅「大米」迪亞高米列圖依家仍然征戰賽場，效力阿甲嘅競賽會，不過曾經效力巴塞隆拿嘅細佬「細米」米列圖就一早喺2012年掛靴，跟住成為獨立隊預備組主帥，但因為同球會主席意見不合而喺上年年尾辭職，最近佢獲學生隊會長華朗睇中，接替愈帶愈差嘅比歷堅奴成為球隊新帥。

「細米」嘅領軍處子戰原本有個好開始，學生隊喺上個周末主場面對阿甲前列分子羅沙里奧中央，臨完場先畀對手逼和，痛失兩分，不過見到學生隊喺「細米」帶領下，球員嘅精神面貌大為提升，今場就算作客亦有望成功贏波。學生隊目前排喺第7組第三位，不過僅以一分落後國民體育會及利伯泰迪，今次對住同組最差嘅SC巴斯隆拿，仲唔搏盡搶分咩！
SC巴斯隆拿又殘又弱

SC巴斯隆拿五戰僅得一勝，以四分排緊榜尾，呢支厄瓜多爾球隊向來實力唔強，今場仲有隊長奧約拿同後衞謝臣杜明基斯因傷缺陣，攻守能力進一步削弱，今仗主場出戰都唔值得睇好，一於捧客勝。