華美倫登場做好戲 巴塞MSN打爆「基」

猪拉多纳

巴塞隆拿同皇家馬德里喺西甲叮噹馬頭，「地上最強」目前僅僅贏個馬鼻以2分領先，為爭標1分都不能少！佢哋今晚西甲快車遇上基達菲，對手今季作客任人魚肉，首席射手艾華路華斯基仲打埋柴，巴塞今場無後顧之憂，近期弗爆嘅「MSN」鋒線盡情狂轟猛炸，讓3球照撐1.93倍「讓主」！

（now632台周三凌晨2:00直播）
基達菲 作客任人O趙

巴塞自歐聯作客擊敗曼城開始，近14場贏13場和1場，走勢唔講得笑。最重要係「MSN」近期火力全開，連續6場入波未斷過纜，當中王牌美斯獨取4球，蘇亞雷斯同尼馬更各斬獲5球，今晚要喺魯營搵食冇難度。再者，今季加盟巴塞嘅後衞華美倫終於擺脫傷患，今場有望上演處子戰，相信隊友會贏得好好睇睇，慶祝佢復出啫！

基達菲連輸2場近況麻麻，作客表現更加差到爆，近8場作客除咗恰到包艇嘅科爾多瓦同排名低過自己嘅艾爾切，其餘6場對住畢爾包、馬體會、華倫西亞等中上游分子全部輸晒，其中5場仲係吞蛋收場。最弊係佢哋繼拿菲達同卡廉尤達兩名中前場主將打柴後，首席射手艾華路華斯基接受肩部手術後亦要抖，今場造訪魯營睇怕都係任人魚肉。