好利高廉頗能飯

不死鸟

今季共編排三次跑馬地日賽，周日上演季內第一回合，在A跑道上演，翻查上次跑全闊A欄係10月7日，當晚八場賽事大熱門只得一冠兩季，至於檔位方面內檔1、2檔無馬贏，反而排12檔起步的「心頭好」及「海力童」卻可克服難度，反映場地偏差不大。
伍碧權馬房今季已贏四W，當中其三在跑馬地取得，前周三更憑「質超駒」及「鼓浪旋風」起孖捧盃而回，陣上飛到馬到交得準，細馬房果然有本身的生存之道。
周日谷中日賽，伍碧權有四匹正選馬「寰宇商人」、「好利高」、「大勇」及「駿盈」，當中十歲老黃忠「好利高」（右圖），今季乃服役第八個年頭，相信亦係最後一季服役，自然無保留必要。此駒季內兩度上陣，初出谷草1650米包尾而回，熱身後上次再出同程跑第五名，在蔡明紹胯下只以兩乘見負於頭馬「心頭好」，復課再操狀態課比課好，今次用薛順強負115磅輕磅有利，再翻同程累積四冠五位成績傲視同群，跑出水準有權取得本身第十場頭馬。