維拉利爾鬥阿聯大件事

猪拉多纳

創會92年首訪澳洲

西甲剛於上周末煞科，維拉利爾即馬不停蹄飛去澳洲踢表演賽，今晚先鬥阿德萊德聯。今次係「黃色潛水艇」創會九十二年來首次同澳洲球迷見面，強陣出擊擺明要省靚招牌。阿德萊德聯踢法一向大開大合，既然今場只屬表演性質，斷估唔會喺主場球迷面前刻意轉型打防守，大盤可期。

（有線61、64、201及203台周五晚6時直播）

今次除咗係維拉利爾首度遠征澳洲，亦係首次有西甲球隊喺阿德萊德聯主場軒特馬殊球場獻技，對當地球迷嚟講夠晒新鮮感。為隆重其事，維拉利爾大部分主力包括前鋒杜斯山度士、韋圖、中場般尼蘇利安奴等均有隨隊，只有借將祖爾甘保不在大軍名單。西甲煞科冇耐，唔使擔心球員狀態不足，預計可以踢場好波畀球迷欣賞。
甘巴爾主攻 阿聯唔識守

阿德萊德聯喺早前季後賽4強出局，已經大半個月冇正式比賽，不過球隊喺前傑志西班牙主帥甘巴爾領軍下踢法一向主攻，睇番佢哋對上九場主場比賽，一共同對手炮製咗三十六個入球，平均每場有四個入球，如以中位數2.5球計，共開出七大一細，兩軍今場都冇心理包袱，再開大盤機會極高。