國足新女唔赦東道主

猪拉多纳

四大驚艷亮麗登場

女子世界盃明早喺加拿大開幕，中國女足「華麗登場」，揭幕戰對東道主加拿大女足！「中女」時隔8年，重返世盃大舞台，令人眼前一亮，唔止實力躍進，仲要位位靚爆鏡，王飛、張越、趙麗娜、李佳悅，更被譽為「四大美女」，迷倒萬千男Fans，勢必獲得大力支持打氣，仲有得受讓，捧中國女足讓球客勝。

（周日早上6時開賽）

中國女足曾因青黃不接，未能打入上屆世盃，慶幸新生代終於冒起，生得亭亭玉立，特別係防線堪稱「美女集中營」，23歲門將趙麗娜早前出戰亞洲盃，憑一張清純秀麗樣貌，仲有1米87高挑身材，被網民形容為「驚艷美女」。
三位門將都咁靚

25歲嘅王飛効力德國球隊圖爾賓，唔止把關技術出色，而且有進攻意識，試過大腳開龍門球，助攻隊友入波，踢5人賽事仲入波添。24歲嘅張越有「淡定女神」之稱，擁有一副「童顏」學生妹樣子，3位美女門將各有賣點，主教練郝偉要諗派邊位上陣，肯定頭痛。

唯一肯定係後衞李佳悅可佔據正選，呢位24歲中堅貌似女星高圓圓，有一對大眼睛，喺防線一眼關七，夠晒可靠。進攻方面，由曾奪得聯賽及全運會神射手嘅馬君孭飛，呢位26歲進攻中場上年更去南韓聯賽搵食，大賽經驗豐富喺前線壓到場。
加拿大陪跑居多

加拿大女足之前5次踢世界盃，有4次分組賽出局，上屆更3戰全敗，屬於陪跑分子。佢哋今場要讓波，好大程度上只因有主場之利，實力唔會高得過「中女」，冇本錢讓波。