神力金剛5歲夠熟

不死鸟

今次夜賽回師谷草上演，編兩組4班1200米，各有一匹新馬初試啼聲，先講第五場「名人」，提到父系Bertolini不其然想起7捷短途佳駟「無敵神駒」，其他同父馬如「應變計劃」、「人緣好馬」開竅後亦勝完再勝，表現好開續好乃此系馬特質；母系血統與本港頗有淵源，半兄弟「大發雄威」、「鎗臣」與「好德煌」在港服役各有所成。綜合兩線，「名人」雖為配售馬不過應該有用，但未必太早熟，睇定先！
第三場「神力金剛」，上季暑期落地後操一大輪，諗住唔好唔跑，點不知季尾6月份左前膝骨折，延至今時今日5歲才上陣，本身出自早熟種Canny Lad，亦遺傳到基本速度，但始終健康有陰影，談不上太大信心，同場對手實在「喎呵」，配腳有必要加入。「盈驥」對上7場全部跑1000米，錯覺以為性能獨沽一味，實際上季出道之初打疊3場1200米做二奶，其中一次於谷草同程僅被「京城孖寶」所擒，事隔一年韌力有增，相信跑此程更勝1000米，加埋2檔天然優勢，在此組4班賽力足主導大局。