博葡萄牙U21有本有「利」

猪拉多纳

英格蘭「幼獅兵團」次次雷聲大雨點小，葡萄牙U21上仗「替天行道」，技術性擊倒呢班得個名嘅英格蘭小國腳，絕對係大快人心。佢哋今晚乘勇出擊，喺U21歐國盃B組次輪分組賽面對意大利，照計可以再下一城，2.18倍客W捧得過。

外圍賽8戰全勝嘅葡萄牙U21，首戰鬥英格蘭U21明顯高一截，贏得1:0叫做贏得少。當中効力士砵亭嘅中場威廉卡維奴表現最搶鏡，喺中場線一個踢晒咁滯，前面就由艾雲卡華利路同上仗入波嘅祖奧馬里奧攻堅，勁有冠軍相。

反觀由迪比亞治奧領軍嘅意大利U21就削削哋，上仗晨早打多個都可以1:2反輸畀瑞典U21，比賽末段被逐嘅中場史杜拿路今晚仲要坐波監添，點睇都唔似係葡萄牙手腳喎！