波圖搶分全力拆車

猪拉多纳

歐聯G組重頭戲，波圖主場對車路士，焦點必定係車仔主帥莫連奴重返成名地倒戈相向，仲要撞番「仇家」卡斯拿斯！兩人喺皇馬時代反晒面，「寸王」雪藏卡斯拿斯，成為呢位西班牙鋼門事業走下坡嘅轉捩點，今季更被迫轉投波圖，冤家路窄重遇莫連奴，實搏老命為自己爭番啖氣。加上車路士陷入低谷，波圖可趁機贏番次，平手盤Mic少捧主勝。

（有線61及201台周三凌晨2時45分直播）

莫連奴04年率領波圖爆冷捧走歐聯，從此飛黃騰達，因此佢對呢支葡超班霸難免有一份情意結，相信唔會去得太盡。事實上，依家戰局已唔輪到「寸王」控制，因為車仔今季表現一直低迷，最醒係上輪歐聯主場大炒特拉維夫馬卡比四蛋。不過，呢支以色列球隊級數唔可以同波圖相提並論，車仔今仗肯定難踢好多。

車路士最大問題係防線遠比以前唔掂，上仗英超對紐卡素都先失兩球，最後攞番一分算執番身彩。歐聯水準更加高，如果車仔後防仍冇改善，一旦先失波，遇上有卡斯拿斯把關嘅波圖，恐怕好難追得番。進攻方面，迪亞高哥斯達、夏薩特狀態亦唔及上季，依家嘅車仔可謂攻不銳、守不穩。
波圖「新伊度奧」腳風順

波圖除後防有卡斯拿斯把關之外，中前場人腳亦不俗，喀麥隆前鋒阿布巴卡演出好搶眼，今季葡超六戰入四球，上輪歐聯作客鬥基輔戴拿模亦梅開二度。以車仔現時豆腐防線，好難招架得住呢位廿三歲嘅「新伊度奧」。由於波圖首輪和波失分，返回主場爭勝求開齋嘅決心更加強，平手盤捧主隊。