今晚歐國盃最人時刻

猪拉多纳

歐國盃外圍賽烽煙四起，A組傳統勁旅荷蘭形勢最惡劣，隨時32年來首次緣盡歐國盃決賽周；H組意大利、挪威、克羅地亞困獸鬥最混亂，邊兩隊直接出線仲係未知之數；B組威爾斯有加里夫巴利復出，大家等睇「紅龍」實現半世紀首進大賽嘅最偉大一刻，總之今晚歐國外，分分鐘都可能係「最」人時刻！

講到最玄妙嘅組別，非A組莫屬，現時捷克同冰島攞咗頭兩名直接出線資格，剩番第3嘅附加賽席位，依家「3哥」土耳其領先荷蘭2分，對賽成績亦較佳，意味着荷蘭不但需要擊敗餘下2支對手哈薩克及捷克，仲要寄望土耳其失分，換句話說，若今輪荷蘭對哈薩克未能全取3分，而捷克「放水」輸畀土耳其的話，「橙衣軍團」便立即出局，所以今晚荷蘭作客哈薩克冇保留，信多次佢哋捧讓球客勝。

假如荷蘭今場爭氣贏波，而捷克又「落力」擊敗土耳其，「橙衣軍團」便可以1分反壓土耳其升番上第3，但若果捷克打和土耳其，咁土軍與荷蘭同得13分，前者就可憑較佳對賽繼續做「三哥」，就算尾場捷克「放水」輸畀荷蘭，只要土耳其贏到冰島，荷蘭都會自1984年後首度無緣歐國盃決賽周，形勢相當被動。
尹佩斯百戰騷攞威

點講都好，荷蘭今晚作客弱旅哈薩克靠自己先。儘管新隊長洛賓、右閘真馬特、中場卡拉臣同新星昆斯普美斯都受傷退隊，不過今仗會係尹佩斯第100次喺國際賽披甲，呢位「左腳王」梗係要入波攞威，加上唔贏大有機會出局，生死關頭信得過，直取讓球客勝。

(有線61及201台周日凌晨零時直播)

同組另一關鍵戰捷克主場對土耳其，捷克已經出線心態放鬆亦屬人之常情，另邊廂「火雞」鬥心十足，仲有得受讓咁筍，斯維力撐土耳其讓球勝。

(有線61及201台周日凌晨2時45分直播)