意大利強「細」搶「疆」爭出線

猪拉多纳

話歐國外H組最緊湊真係不為過，排名前3嘅球隊喺未踢今輪比賽前只係相差3分，要鬥到最後先知邊兩隊唔使踢附加賽直入決賽周。榜首意大利今仗作客阿塞拜疆不勝無歸，但佢哋好可能留力下仗惡鬥挪威，都係捧1.62倍入球細划算。

（有線64、203及中央5台周日凌晨0:00直播）
慎防留力下仗硬撼挪威

講人腳論經驗，意大利贏對手幾條街，老將派路繼續喺中場派牌，不過隊波鋒力麻麻，近5仗夾埋入得4粒，早前對住同組另一弱旅馬爾他亦只係小勝1:0。更何況阿塞拜疆早排連續悶和挪威、克羅地亞0:0，防守力係有番咁上下，意大利贏波唔難，但想炒爆對手就唔係咁易咯。
克羅地亞打「保」捱細界

同組排第3位嘅克羅地亞，今輪喺主場恭候保加利亞。

（開賽時間：周日凌晨2:45）克羅地亞為直入決賽周必定搏命，弊在主力射手文迪蘇傑打柴、奧歷坐波監，火力大減，而且連續3仗不勝，睇怕都幾難盡情數胡，玩1.85倍入球細穩陣。