波蘭 愛爾蘭「大」混戰

猪拉多纳

羅拔當弗 防線牙煙

今晚歐國外最矚目賽事，肯定非D組嘅「雙蘭大戰」莫屬，「二哥」波蘭同「三哥」愛爾蘭同得18分，戰果將決定邊隊可以入決賽周。愛爾蘭上仗爆冷擊敗德國，今場又有多件主力復出，即使波蘭有大勇嘅射手羅拔利雲度夫斯基壓陣，主場都未必贏硬，與其估輸贏，不如轉捧2.2倍入球大仲穩陣。

（有線64、203、中央5台周一凌晨2:45直播）
愛爾蘭場均入兩粒

家陣「雙蘭」同樣揸住18分喺手，按賽例若兩隊同分，先睇雙方對賽成績，成績相同再計算作客入球優惠。換言之首循環同波蘭打和1:1嘅愛爾蘭，只要今仗取得2個入球或以上，波蘭就焗住要贏波先保得住直入決賽周席位。所以愈多波入對愛爾蘭嚟講愈有着數，唔驚佢哋今仗唔搶攻！

講狀態，呢支英倫球隊近4場分組賽喪搶10分，上仗殺敗德國更令球隊聲勢大振，加上中場占士麥堅恩、格連韋倫刑滿復出，守將史密斯高文、馬克威爾遜亦傷愈候命，令球隊實力更趨完整。以佢哋喺D組場均攻入兩粒嘅鋒力，今仗作客波蘭大有本錢駁火。
波蘭鋒力猶勝德國

論火力波蘭亦唔輸蝕得去邊，呢支東歐球隊喺D組轟入31球，比世盃盟主德國仲要多。呢鋪撞正愛爾蘭正選門將基雲受傷，料由經驗輸一大截嘅戴倫蘭杜夫把關，上輪作客蘇格蘭又整兩粒嘅射手羅拔利雲度夫斯基，唔難延續自己嘅士哥潮喎。

之不過咁，波蘭防線呢排跌晒Watt，近3仗分組賽夾埋失咗6球，咪話唔牙煙。何況呢支東歐球隊似乎唔習慣應付英式踢法，兩遇蘇格蘭合共失守4次，首循環鬥「綠衫軍」亦保唔住清白身，今仗對住盡地一煲嘅愛爾蘭就更難擋得住，各位波友買定花生等睇入球騷都得咯。