多蒙特盡谷半場大

猪拉多纳

為求翻身 Friend都冇緬畀

今夜德甲獨腳戲緬恩斯主場鬥多蒙特，兩軍關係雖然極其密切，但每次碰頭都大打真軍，多蒙特喺德甲同歐聯已經合共4戰不勝，喺積分榜被拜仁拋離7分，今晚揚言要盡早入波走出低谷，遇上攻強守弱嘅緬恩斯會係對攻好戲，大盤只得1.43倍熱到冇味，推介2.05倍半場大。

（now 671、有線61及201台周六凌晨2時30分直播）
搶到首球贏面極高

多蒙特新帥杜曹一直行緊前主帥高普舊路，當高普於08年離開緬恩斯加盟多蒙特後，緬恩斯帥位由杜曹接手，及後高普離任，杜曹又嚟多蒙特接班，兩人同兩間球會都關係密切，但friend還friend，兩隊每次對陣都踢到飛沙劈石，雙方近4次碰頭就一共出現5球12碼，真係激到暈！多蒙特揚言要借今仗走出低谷，球會官網仲大字標題聲稱要盡早搶得第一個入球，皆因多蒙特近12場聯賽取得領先優勢，最終都能贏波而回，上次入第一球之後失分已經係去年12月對禾夫斯堡，佢哋亦提到緬恩斯近6次入到第一球之後都贏，所以今場邊隊早着先鞭最重要。

多蒙特近績麻麻，但主要問題係防線，今季3線作戰15場正式賽事都有入波，球隊近10次對緬恩斯錄得8勝1和1負佳績，尤其靈魂人物馬高列奧斯11次對緬恩斯已經入咗8球，加埋大勇嘅奧巴美揚同米希達利恩，今場唔憂入唔到波，但防線舒姆沙同艾歷杜姆都缺陣，正選門將路文貝基大拇指有傷上陣成疑，防線並唔穩陣。
緬恩斯火力唔失禮

緬恩斯每次有教練離開都唔使擔心，杜曹接高普手毫不遜色，到依家馬田舒密特代替杜曹一樣出色，球隊今季德甲排緊第8並唔失禮，前線尤路斯馬爾尼更係當紅炸子雞，配合日本天才武藤嘉紀攻堅火力十足，不過防線就唔開胃，除咗對弱旅漢諾威外，其餘7仗都有失波，今晚同多蒙特駁火，失波預期唔會少。