馮諾嘉手記：軍士拉士勁強配柏寶掂

聪明的白痴

　　剛戰徐君禮易配嘅五匹坐騎中，「鄉村傳奇」同「風之子」都順利奪冠，原本蔡明紹正值停賽，師父告東尼有心益吓徒弟仔徐君禮，交幾匹餐士馬畀佢，點知依家就畀人哋冷手執個熱煎堆，徐君禮上個禮拜三興高采烈咁贏馬捧盃，跟住禮拜日晚仲開開心心咁出席朋友生日宴會，自從上次因禁藥事件停賽半年後復出，佢無論喺晨課抑或陣上，表現都明顯比前積極，睇得出佢今次事前乜都唔知，聽講同上次情況一樣，受身邊人拖累，近朱者赤，近墨者黑嘅道理好多人都明白，朋友也好，另一半也好，真係要帶眼識人，縱然今次事件係無辜惹禍，但係馬會只相信證據，作為佢嘅朋友，當然希望佢吉人天相，儘管相信今次好難獲輕判﹗

　　講到倒霉，近期唔止徐君禮一人，仲有練馬師薛達志，佢自十一月頭贏過後已經23個賽日冇馬贏，「森淼盛」贏馬但畀人告甩貶做第二，證明佢黑氣未除，現時佢喺練馬師龍虎榜排名包尾，已經有唔少馬拉倉他投，馬房本身又多事端，真係應晒所謂嘅行船遇着對頭風，人衰行路打倒褪，希望佢兩個早啲黑氣盡除，福氣重臨。

軍刀強敵已去

　　講番嚟緊周日賽事，支持賀賢一對馬「軍刀」同「軍士」。前駒列陣第三場三班1600米，呢匹新西蘭自購馬嚟香港後跑過兩場，前次初出1400米跑近，上場則喺王志偉胯下跑第三，兩場嘅衝刺都好勁，只係兩次都遇上超班馬「勇敢小子」，呢場強敵已去，後勁馬回配柏寶亦恰當，跑長二百米，啱晒佢發揮後勁。

　　「軍士」則喺第五場角逐四班1400米，呢匹賀賢練馬師團體馬，可以講係同前駒同主，前仗跑田草1400米，喺王志偉胯下後上如飛獲亞軍，只輸短馬頭位，上場大敗皆因途中遇到好多意外，今次亦同前駒一樣換上柏寶，賀賢搵到佢出馬，應該可以贏番場。