1860細守緬恩斯

猪拉多纳

另一支慕尼黑球隊，德乙嘅1860慕尼黑客戰德甲球隊緬恩斯，1860今季表現平平，球隊仍未搵到贏波辦法，今仗作客面對近三仗主場未贏過嘅緬恩斯，阿謙相信兩隊都會踢得非常謹慎，一於捧入球細。

（TVB 13周三凌晨2時直播）
緬恩斯態沉唔會谷

1860慕尼黑係今季德國各職業聯賽當中唯一仍未打開勝利之門嘅球隊，可見佢哋嘅進攻能力認真麻麻，球隊早前將主帥科寧「炒魷魚」，換上經驗豐富嘅「戰術大師」莫夏文領軍。不過，莫夏文由於要入院做膽臟手術，上仗球隊作客輸畀格雷特霍夫都冇督師，今仗造訪緬恩斯亦未知能否領軍，對1860始終有影響。其實1860慕尼黑成績咁差，同傷兵多有好大關係，陣中長期有7至8名傷兵，包括後衞貝路同前鋒史堤芬夏恩等，今仗作客緬恩斯相信都會踢得較保守，務求以唔失波為目標。

緬恩斯上周六聯賽主場以1比3不敵雲達不來梅，球隊喺聯賽已經兩連敗，近三仗主場賽更未贏過，狀態同1860慕尼黑一樣咁差。緬恩斯今季後防表現不穩，10場聯賽只有1場能夠保住清白之身，而且近4場聯賽都至少畀對手攻入兩球，可見球隊防線出現問題。緬恩斯陣中仍有前鋒祖安哥度巴、中場艾堅蘇圖、森寧、法比安費爾及後衞軒歷基沙蘭奴因傷唔踢得，今仗就算有主場之利都唔會踢得進取，阿謙估計今場入波唔會多，一於捧細盤。