雙紅開騷主帥各出奇謀

猪拉多纳

高普求開齋 紅軍細嗒般尼茅夫

英聯盃16強雙紅出擊，利物浦同曼聯可唔可以威番鋪呀？紅軍激情主帥高普仲未開齋，今場主場對般尼茅夫，唔贏等幾時？紅魔則喺主場對住英冠米杜士堡，尹戈爾會唔會好似上季放棄呢隻盃仔，慘吞米爾頓凱恩斯4蛋羞家出局呢？

利物浦連和3場，「高普熱」逐漸消退，大家都明白，呢支紅軍好難執番掂！利物浦今場英聯盃16強主場對住般尼茅夫，會係高普開齋大好時機，不過咁易畀你估到，就唔係叫利物浦喇！傷兵問題嚴重，高普手上可調動嘅兵源唔多，今場又唔贏唔得，預料高普喺正選陣容上唔會有太大改動，班主力真係踢到腳仔軟呀，加上球員壓力愈嚟愈大，紅軍今場頂多小勝，捧2.2倍嘅細盤仲和味！

（TVB 302周四凌晨3時45分直播）
兵源不足炒唔起

利物浦近9場和8場，當中有7場開出「黃金波膽」1比1！激情教頭高普上任後，紅軍表現的確有改善，防守穩健咗，不過進攻都係唔掂，高效射手史杜列治繼續養傷，今場好大機會繼續缺陣；中場發電機菲臘比古天奴狀態低迷，冇晒電咁。結果，前面嘅賓迪基完全缺乏供應，波都掂唔到呀，陰功。

之但係今場為咗爭勝，高普應該都會派番呢班主力正選上陣，因為根本冇其他人靠得住，副隊長占士米拿停賽，其他副選好似祖阿倫、佐敦伊比、奧歷治又未夠班，所以好難怪高普帶隊3場，3場嘅陣容都冇乜點變，因為想變都變唔到！高普主張嘅係高強度壓迫性踢法，班主力場場咁踢足90分鐘，唔踢到殘都踢到腳軟，今場想攻都有心無力喇！

般尼茅夫連輸兩場1比5，對手分別係曼城同熱刺，兩隊波嘅攻力都高過紅軍幾倍，般尼茅夫今場只要死守城池，一定唔會大敗先！般尼茅夫近兩季3對利物浦，對上一場就係喺英超僅敗1球，細盤值追！