賠率有路捉：牛精富星位置熱透

纯情小彩迷

　　尾場「牛精富星」噚日位置早飛熱到不得了，係12蚊大熱門，可以話孭起成個彩池咁滯。睇番隻馬今季所獲一W兩P都係有分頭，上次仲係34倍放入一席季軍，而大前仗配韋達就有大敗前科，但相信今晚起用柏寶應該唔會走樣，一來早飛硬淨，二來柏寶曾經策騎同主嘅「牛精福星」贏過主席錦標、冠軍一哩賽、同埋安田紀念賽，與幕後合作有晒默契，今晚憑住一檔，沿途且戰且走，三甲好穩陣，值得一W三P投注。

紅封包十拿九穩

　　仲有第六場方廐「紅封包」用楊明綸WP熱透，33蚊W，12蚊P，可以話係佳兆。事關今季方嘉柏加楊明綸呢個組合跑谷草，勁到不得了。八次合作贏出「喜寶寶」、「幸運愉快」同「贏馬組合」，仲有「發達心聲」、「榮進寶寶」同「真叻仔」入位 。既然騎練合作谷中有根據，WP又有強勁早飛支持，「紅封包」熱得嚟好穩陣，呢場千祈咪刻意博冷。

柏寶勝算大

　　騎師王方面，柏寶最熱，仲拋離潘頓同韋達，開盤手明顯非常睇好。事關前者騎足八場，而且惡馬多，坐騎質量都比其他騎師好，例如「魔力勁」、「嘉飛」、「開心歡樂」同「牛精富星」都係坐位望贏馬，相信柏寶可順利登上騎師王。

周仲