鹿角飛腳均「細」兄弟波

猪拉多纳

日聯盃決戰

鹿島鹿角、大阪飛腳今日响「埼玉2002世界盃球場」交鋒，上演日聯盃終極決戰，呢兩支日職勁旅無論實力、戰術風格都幾乎一個餅印，咁勢均力敵嘅冠軍決鬥，都係博個1.95倍入球細，保險過揀中立場讓波嘅鹿島。

（有線61、201周六中午12:05直播）

其實今場真係好特別，近況、往績佔優嘅飛腳，係日本球迷心目中嘅奪標熱門，J聯賽官網嘅投票，七成人睇好佢哋捧盃，但係足智彩嘅諗法好唔同，鹿島要讓飛腳平半，好似逼人博飛腳咁。當然，足智彩開得咁嘅盤口，一定有佢嘅道理，譬如日聯盃有一個「新星大獎定律」，每年邊隊有人攞到決賽前頒發嘅「New Hero」大獎，嗰隊幾乎六成幾機會Win得，由1996年有呢個新人獎起計，當中14場決賽，有9次由有「New Hero」嗰隊勝出，只得5次個「Hero」做咗二奶，今年日聯盃「New Hero」獎項係由鹿島24歲鋒將赤崎秀平攞到，所以信邪嘅博鹿島無妨。

但係飛腳對鹿島往績根本係絕對均勢，聯賽交手係鹿島12勝8和12負，日聯盃加日皇盃嘅盃賽對碰，鹿島加埋係4勝2和5負輸蝕些少。況且佢哋有中場土居聖真斷腳休戰，今季聯賽又畀飛腳雙殺，以往响埼玉打波亦得6勝4和13負，平手盤都未必有人敢睇好，更何況要讓波添！
日聯盃決戰逾六成開細

由於鹿島、飛腳兩隊都講求攻守轉換快速，連聯賽場均控球率都相近（鹿島52.8%、飛腳50.8%），而且一樣靠三張幾嘢嘅小笠原滿男（鹿島）、遠藤保仁（飛腳）喺中場控制節奏，打法太過類似，呢啲兄弟波決戰，好容易相生相剋，陷入拉鋸僵局，90分鐘分唔出勝負真係唔奇。事實由1998年起回復一場過賽制之後，日聯盃決戰開咗11細6大，開細比率超過六成，博入球細喇！