勝利主場惡大起鳳凰

猪拉多纳

今日有多場直播賽事，可以由日頭睇到凌晨，澳職打頭炮，墨爾本勝利主場對威靈頓鳳凰。上季常規賽及季後賽雙料冠軍墨爾本勝利，雖然今季成績退步，但主場仍然好惡，近兩2次主場比賽，全勝共轟入6球。威靈頓鳳凰大踢性感足球，有前冇後，聯賽3戰全開大。1.53倍入球大熱得有道理，屬於過關穩選。

（有線64及203台周一下午4時30分直播）

墨爾本勝利3場聯賽僅1勝，皆因有兩場作客都失分，但佢哋主場作戰仍然好有霸氣，包括澳足盃以3比1擊敗阿德萊德聯，聯賽打吡戰贏墨爾本城3比2，並剛於上仗澳足盃大勝侯姆城3比0，打入決賽，大大振奮士氣。所以墨爾本勝利今仗喺自己地頭出擊，入波應該唔難。
森多安玻里受讓串燒

新西蘭球隊威靈頓鳳凰近兩季有好大進步，今季更大踢進攻足球，3場聯賽入6球，亦失咗5球，充滿娛樂性，前鋒基舒拿連續兩場入波，腳風非常順。鳳凰取得兩連勝，應該開始心雄，作客都唔怕同墨爾本勝利鬥攻。

另外，今晚仲有兩場意甲，基爾禾主場對森多利亞，主隊3連敗，真係頹到爆，森多利亞射手艾達馬田斯上仗又建功，今季已轟入8球，淨係佢一人已可反轉基爾禾防線。森多利亞仲有得受讓，必捧讓球客勝。

（TVB301周二凌晨2時直播）

至於巴勒莫主場對安玻里，安玻里連續兩場有分落袋，表現硬淨，受讓值得捧場。

（TVB301周二凌晨4時直播）