洪禮賢講馬：賽駒跑法無定向 賠率冷熱作取捨

纯情小彩迷

　　長路有盡時，的確係至理名言，像近期的柏寶已是最佳例子，佢在上月的四期谷草賽事，次次贏到騎師王，偏偏剛周三遭逢滑鐵盧，臨尾與小楊同分，但因頭馬得一場，數胡尾輸咗，其實佢再對上一期田戰已經係「影相」見負，勢估唔到會一期接一期「影輸」，捧咗佢嘅騎師王的馬友（如我），真係呻到樹葉都落埋。

　　 睇番啱啱嘅谷草賽事，好些馬在跑法唔同情況下，便會有不同效果，像「引伸波幅」，呢次唔使留咁後，即刻贏到甩晒，但呢匹馬之前留得幾後一樣贏過，所以唔會覺得有咩問題。但見同場跑第二嘅「福到多多」，跑法上唔覺有連貫性可言（就算洪某賽前係估佢會留住，亦唔多alright），兩場之前的同程，採留前鬥後策略勝出，上場「無啦啦」擺在前走（由於前仗預計步速慢，而排一檔，因此騎者獲指示置前），結果尾二返嚟。

　　到了剛仗，「福到多多」又留番住，就算贏唔到都有Q。嘩，場場跑法甚為極端，如果連埋再之前嗰兩場，基本上，近呢五場同程冇一次在跑法上係相似（都唔好講要一樣嘞﹗），雖則此駒之前未建立到賽績，唔可以一口咬定咩跑法最適合，但贏完之後就唔同，卻一樣出現波動性處理手法，那麼，幾時會留，何時認為步速慢而擺前走喪放，真係幾無定向，唯一可以應對呢類馬，就係每當有賠率可試水，否則，忍手為妙。