馮諾嘉手記：越跑越有檔利出頭

纯情小彩迷

　　前日睇過蔡明紹嘅訪問，佢能夠喺短短一年內贏夠七十場頭馬畢業，當然值得高興。而最令小妹感動嘅，係佢嘅養母講到蔡明紹墮馬入院嘅一刻，做父母嘅心情既緊張又心痛，養母講嗰陣差啲流眼淚，可能因為蔡明紹係孤兒，但養母視如己出，比起親生母更愛惜佢，所以更能觸動人心。

　　騎馬係危險性高嘅行業，為人父母擔心囝囝嘅同時，但又要尊重同支持佢嘅選擇。而呢次意外對蔡明紹嚟講，最難克服嘅反而係傳媒帶畀佢嘅壓力，小妹亦曾經多次提過，傳媒太過吹捧佢，對佢或其他見習生嚟講都未必係好事。相反嚟講，韋達係多屆冠軍騎師，經常受傳媒批評，畀馬迷報以噓聲，連輸幾場熱門，行圈時全場起哄，佢亦一笑置之，呢一種壓力，相信蔡明紹慢慢就會習慣。

　　禮拜日十場泥草混合賽，第一場四班1000米草地直路賽，呢場有成七匹新馬初出，最鍾意已有出賽經驗嘅「勁勇士」，至今出四場，近兩仗都獲亞軍，上場同程力追「太極至尊」，對手走外欄場地較好，只係以短馬頭位僅敗，追勢吸引，今次檔位外移更有利，隨時贏馬開齋。

　　第二場四班1400米草地，最鍾意係質新馬「越跑越有」，呢場嘅對手實力非強，講潛質同近態無出其右，前仗初出跑1200米已經得第二，上場韋達接手被捧成大熱門，早段走二叠蝕位，最終只距頭馬四分三馬位，今場排三檔好跑得多，可以出頭。