車仔死火撐基輔下盤

猪拉多纳

眾叛親離 寸王寸唔起

車路士今晚喺歐聯G組主場對基輔戴拿模，讓半一捧唔過，因為車路士領隊莫連奴已經失勢，隊中根本冇人撐佢，除咗夏薩特傳聞揸流攤，威脅下季有寸王就冇佢，最新消息話迪亞高哥斯達都嗌走，大家睇到莫連奴收晒火變死狗，寸王寸唔起又有乜用呀？

（有線64及203周四凌晨3:45直播）

雖然英國傳媒話，就算車仔今晚再出事，老細阿布都唔會炒人住，但睇番車仔連盃賽近8場得1勝3和4負，真係好難想像佢哋係莫連奴執教嘅球隊，而且大家應該感覺到，依家車仔內部已經冇人敢出面撐寸王，就算隊長泰利都壓唔住班作反隊友，衰落去似乎係意料中事。
夏薩特 迪亞高哥斯達嗌走

事實上，莫連奴份人不嬲多疑心，以往執教皇家馬德里，已經成日覺得有人同佢作對，甚至洩露更衣室秘密畀記者，搞到佢排陣嘅時候，都唔知信邊個好，家陣夏薩特半公開作反，要挾下季轉會皇馬，迪亞高哥斯達又話成日畀球證針對，冇癮想走人，真係唔知搵邊個救寸王囉！

另一方面，基輔喺列布夫執教下，近排踢到着晒火，而且佢球員時代踢過熱刺，對於車仔有一定認識，兩個星期前基輔喺主場以0:0打和車仔，並唔係撞彩。或者大家覺得，現時基輔嘅牌面普通，但佢哋嘅前鋒耶莫蘭高係烏克蘭國家隊主力，車仔都想簽佢，應該可以幫基輔開下盤喎！