光輝鬥勝利和波Encore

猪拉多纳

澳洲足總盃決賽今午開打，連續兩年打入澳足盃決賽嘅珀斯光輝今場將會作客墨爾本勝利。光輝舊年飲恨僅得亞軍，今次決心捧盃揚威；兩隊實力差距不大，雙方近4次交手喺法定時間內3場賽和，今仗預期戰情同樣緊湊，不妨博和局。

（有線64及203台周六下午4時30分直播）
光輝決心爭盃頂得住

墨爾本勝利開季表現平穩，聯賽4戰2勝1和1負，其中兩次主場全勝。隊中兩大攻擊主力貝利沙及巴巴路西斯已上力，上輪聯賽勝利喺主場以3比0戰勝威靈頓鳳凰，佢兩個包辦3個入球。貝利沙於澳足盃累積4個入球，巴巴路西斯亦有3球進帳，今仗將成對手防線心腹大患。

之但係珀斯光輝一啲都唔好蝦，爭冠決心極大，佢哋去年殺入澳足盃決賽，最終作客0比1不敵阿德萊德聯，今年捲土重來，誓要捧盃而回！光輝今季聯賽4戰1勝3負，客場2戰全敗，表現只屬一般，不過光輝近4次對墨爾本勝利保持不敗，取得1勝3和，當中包括去屆澳足盃4強戰90分鐘內踢成2比2，加時後贏4比2淘汰對手，今場一場過決賽相信可頂得住墨爾本勝利，兩隊有望再次握手言和要加時，甚至互射12碼分勝負。