萊茵河打吡中門大開

猪拉多纳

利華強攻 科隆唔龜縮

德國西部今晚上演萊茵河打吡，利華古遜主場迎戰世仇鄰居科隆，兩軍近期表現唔曳，但成績卻極曳，谷埋一肚氣等呢場打吡戰爆發，兩軍都希望能夠喺國際賽休戰期之前走出低谷，預期會係一場入球騷，推介大盤。

（now 670、有線64及203台周六晚10時30分直播）

利華古遜近期兩線作戰連敗，但其實踢得相當好，尤其前線「小豆」查維亞靴南迪斯、美密迪同比拿拉比狀態都極弗，不過上輪德甲作客禾夫斯堡，因為主隊舒賀爾尼一個越位入球而飲恨，跟住歐聯作客羅馬，半場落後兩粒都追得和，最後因為奧馬托柏克喺禁區內犯規，慘食紅牌兼被罰12碼全餐，最終又係僅輸。
兩軍求勝博反彈

經過呢兩場作客谷氣波，今仗終於返到主場，而且踢完今仗仲有得休戰，面對死敵科隆當然乜都唔使諗，盡情數胡出番一口烏氣。

科隆近績下滑，已經4場冇波入，箭頭莫迪斯迪有質有態，但就硬係欠缺運氣，上輪主場對賀芬咸場上表現亦佔優，可惜末段比頓確特喺禁區內被客軍韓援金珍洙侵犯，未獲球證判12碼，最終悶和收場，不過球會官網盛讚球隊踢得好，只係近期冇入波運，今晚首要目標係取得入球，即使作客都唔會龜縮。呢個萊茵河打吡戲碼，近3季喺利華古遜主場都開大，每次碰頭總入球最少都有5粒，大盤值得再追。