洪禮賢講馬：鵬力洋洋出頭

纯情小彩迷

　　大摩與告東尼馬房今日各有重兵在手，估計都會有大手交易，按後者出馬的質與量，必定大舉搏殺，唔使點擔心會雷聲大雨點小，反之前者則太耐冇大攻勢，希望今期唔會又令擁躉失望。

重心場次

第7場  第二班（100-80分）1400米 草地

　　貝利高揸住贏「締造美麗」的賽績（乃季內62場同程最快頭馬），級數的確高晒，就算重磅令實力打折扣，若轉馬房初出能交到八九成水準，已經好大機會贏到。

　　「步步快」季內冇一場輸得遠，係技窮還是未搵啱路程，呢次縮落此程應有更深了解。「川滙主帥」上場如果唔係騎者末段過分滋油，跑入殿軍的過程唔會咁辛苦，不過路短一樣掂，看來狀態跑番起，轉回此程兼有一檔之利，危險性幾大。

　    「非我莫屬」好像田草版本的「寶利多」，經常拉士爆一段，卻成日得個近字，T或F拖吓唔反對﹔「龍的風采」情況差唔多，唯一唔同係今季呢對騎練合作往績唔好（29匹次僅得兩P）。「豐綵」剛賽亂放唔斷尾，睇得出經過前仗開氣後，進度嚟得快，估計今場或有廐侶帶住跑，稍留效果可能更理想。「帝豪名駒」上場輸近的賽績唔算證明好多（全程貼晒欄但唔覺湧得勁）。

第1場  第四班（60-40分）1000米 草地

　　威力無窮接連跑得好，來到季中已進入狀態，夾正落班的好時機，既然前仗在三班高分區域的同程也有第五名，在此應該好惡。「勁勇士」一再鬥輸，係冇運，又可能係唔鬥得，捧得過熱只宜作配。

　    「科研精英」初出走規未熟仍有P，跑一場如學叻一場，名次不難提升。「盈彩繽紛」打好根基才動身，靚仔馬揀定先。「威威財星」長期唔放，吹佢唔脹﹗「好辣椒」重新開氣後，應該好快入局，邊線馬。

第2場  第四班（60-40分）1400米 草地

　　越跑越有初跑此程跟得前咗一樣唔斷，有過實戰經驗後，人馬若有所領悟，已具出頭機會。「雄獅寶貝」唔慣轉急彎（一路側頭及外閃），所以唔使介意上場谷草名次普通的賽績，重返1400米或唔同晒。

　    「成功網絡」及「同歡笑」，一對前置型馬，前駒應較可取，除了出閘反應可靠啲，五檔點都安全多少。「東方駿馬」倘見臨場情緒收斂，呢次加配件和增程，或可變身。「連利威勁」均速馬增程一定啱，但始終上仗前蹄問題退出，宜留意一仗。「祝福滿滿」減一分落五班，屆時大把世界。

第3場  第三班（80-60分）1000米 草地

　　萬事佳一出即勝同程，締速為季內8場四班第二快，僅次於「齊歡唱」，後駒四升三班一樣冇阻力，伸算前駒機會亦高。「尚駿心」兜兜轉轉又返直路賽，前中段如扯得快，呢類角逐環境最啱佢。

　    「皇仁神駒」好開，唔難喼到，轉此程也合適。「特色咖啡」及「明燈」兩匹PP唔排除會接近。「軍策令」105磅咩事都可發生，何況佢一再於短途追得好。「永同至尊」大閘顯示唔錯速度，惜之前健康曾受挫，冷門至敲。

第4場  第五班（40-10分）1650米 泥地

　　冰火跑完隔咗一排至復課，而韋達季內泥地又未贏過，條件係有挑剔地方，但假假地前仗能與「萬能駒」和「果然勁」串Ｔ，級數在此秤先。「野蠻」係班內此程前列常客，正路之選。

　    「威威」及「高鳴」縱使唔覺好有冠軍相，但近績穩定。「煇煌駒」檔好，路程又係近仗中最啱。「金威神童」難靠，「將臣三號」和「年年開心」衰大外檔，可爭不穩。

第5場  第四班（60-40分）1800米 草地

　　鵬力洋洋上場就算直路初段早點望空，唔見得有能力威脅到前兩名，似乎現階段中程已唔多滿足到佢嘅性能，嘗試增程而唔等年初三1600米，帶出求勝決心。「呼風喚雨」及「福龍」級數唔夠，勝在當打。

　    「經典能量」成日跑得近，如配備上戴戴除除有作用，可能有更佳演出。「陸豐福星」上場八檔都沿途四叠，呢次十三檔，唔見得阿昌可克服。「光芒四射」上場增程的表現比預期失色。「如雷」剛賽不留而放，賽績不用理，好歹在季初能於57至63分攞到冠亞季各一，目前評分冇壓力，而上場或許係加定眼罩為今仗鋪路，大冷可諗諗。

第6場  第三班（80-60分）1200米 泥地

　　自家威跑法主動，一檔正晒，「一定快」則泥地未輸過，似乎係單Ｑ格局。

　    「兄弟齊心」排番內檔，競爭力會完全唔同晒。「善戰」及「時代明星」排晒大外檔，唔易克服。「超群財星」年幾冇出，一樣輸得唔脫節，而呢次賽前工夫可加大力度，整多課大閘，出動到韋達，似樣。「心歡笑」太易會跑錯嘅馬，早段一留得唔好就瓜，成熱門唔值博。

第8場  本地三級賽 1800米 草地

　　好日子難贏卻周不時跑三三四四，既然檔好路程啱，膽材。「好先生」忠心馬上場斷纜冇法子，回到本地賽又會有番威力。

　    「爆冷」跑G3好似幾筍，之但係，唔係平磅，負133磅點都有壓力。「漂亮第一」上場已經攞嚟做膽，最終唔夠「極品絲綢」鬥，但賽績唔失禮，呢次只負111磅，續可看好。「喜聚寶」與「怡勝」有賠率可拖一注，始終都係有分量的長途好手。

第9場  第二班（100-75分）1650米 泥地

　　千杯不醉早已講了贏同程一役有幾勁（季內最快），只要今場唔係步速過慢，拉士又會爆上嚟。「絕塵」馬重輕番係好現象，始終今季長期亮相都係有少少肥，如今日臨場見到收身ok，泥地王會翻身。

　    「喜威寶」守好位跑法在四檔起步着數。「鷹闖」泥地性能冇乜證明，純粹以近績穩定作賣點。「穿針引線」地莊見盡，只係泥地叻。「幸福紅椒」上場早段處理手法唔好，換上德叔可憧憬。「特綵」和「人緣好馬」三三四四之流。

第10場  第三班（80-60分）1400米 草地

　　超群如意隔番一排再跑，體力強大，殺傷力有增無減。「雨電風雷」回到三班有番晒競爭力。「又贏晒」不易撼低前兩駒，不過跑法上會在今場賺到，位望唔係冇。

　    「普梳王」只贏隻四升三班「蓬萊仙子」，但締速唔曳，希望中檔蝕得起。「戴宗」隔夜一滴飛都冇，唔多對勁﹗﹖「座頭市」、「雄心馬主」及「再來風」齊齊在陣，早段唔快就奇，當然佢哋亦唔易捱到。