Ｃ朗歎私房菜皇馬開大餐

猪拉多纳

西甲尾場提早奪得歐聯16強資格嘅皇家馬德里將作客西維爾，天王基斯坦奴朗拿度又係開餐時間。C朗對住西維爾特別生猛，過去9次對碰竟然入咗18粒，令雙方呢9次碰頭入球數字高達46球，真係多多都大得起，碰啱又傳出C朗想走人，無論係表演畀新東家定係皇馬睇，相信佢一樣搏命入波，入球大必捧。

（now 632周一凌晨3時30分直播）

皇馬上周中歐聯擊敗巴黎聖日耳門肯定出線，本來係一件值得高興嘅事，但比賽卻出現插曲，C朗賽前接受訪問話會離隊他投，入場時被會長皮里茲摑面，據西班牙傳媒報道二人嘅對話係，皮里茲一邊摑一邊講「聽講你話想轉會喎！」C朗黑面回應「冇喎，我乜都冇講過。」跟住再對住鏡頭細聲講咗句類似「黐線」嘅話，賽後C朗又專登行去同聖日耳門教頭白蘭斯耳語，擺明玩嘢。
近9對西維爾8開入球大

其實C朗一向好火，唔鍾意畀人限制住，呢道火應該可持續喺今仗，因為西維爾係佢私房菜，過去9次西甲碰頭，C朗攻破西維爾大門18次，包括4次帽子戲法及一次「大四喜」，夠晒癲。兩軍呢9次碰頭有8次開大，合共產生46個入波，皇馬開過3次「其他贏」。西維爾近況麻麻，今場應該都係大屠殺格局，大盤固然可取，26倍波膽「客其他」亦可一試。