紅軍火力弱追水晶宮半和

猪拉多纳

利物浦最近連贏3場，新帥高普居功至偉，防守確係穩健咗好多，利迷唔使再按平安鐘同食救心丹，不過進攻仍有待改善，今晚紅軍主場迎戰近年剋星水晶宮，半場或難分出勝負，加上水晶宮近13仗開咗12次半場和，既然呢瓣咁旺，唔怕再追！

（now 622周一凌晨零時直播）

講番利物浦最近3場勝仗，先喺英聯盃小勝般尼茅夫，高普打開勝利之門，下一場更威水，作客揮低車路士3比1，之後遠征俄羅斯，喺歐霸盃又以1比0擊敗魯賓卡山，成功取得近3年來首場歐戰作客勝仗。見到紅軍無論係踢法定士氣上，一場比一場進步，就知球隊喺高普帶領下，正係向好方面發展。
前線太倚賴賓迪基

不過，羅馬非一日建成，紅軍嘅中場組織、默契依然麻麻，而且喺射手史杜列治繼續養傷嘅情況下，隊波得賓迪基一個把握力較強嘅進攻球員，菲臘比古天奴嘅射門命中率唔高，其他中場球員嘅射術更係曳，所以解釋高普領軍嘅6場波，有5場都只係入得一球咁大把。

利物浦飛完俄羅斯，抖咗兩日就要再上戰場，體力肯定較對手輸蝕，加上近4次對水晶宮錄得1勝1和2負，睇嚟今場都係攞唔到甜頭。水晶宮上場聯賽主場和曼聯0比0，又一場開出半場和，齋計英超，已經係連續10場開出半場和，計埋盃賽則近13仗有12次開出半和，攤路非常誇張，今場作客晏菲路，水晶宮肯定又係穩守行先，再捧半場和！