巴西受讓斬草除根

猪拉多纳

尼馬復出整治死火雄鷹

「新比利」復出插多阿根廷一刀！世盃南美洲區外圍賽聽朝重燃戰火，重頭戲梗係阿根廷主場硬撼巴西。阿根廷頭兩場未贏過兼冇士哥，隊長美斯及阿古路今仗續因傷落選，連「野獸」泰維斯都退隊，進攻死晒火。相反「森巴兵團」有隊長尼馬刑滿復出，「新比利」為球隊搶分之餘，仲要為自己喺國際足協金球獎爭「阿二」拉票，面對南美死對頭仲唔係騷哥利嘅最佳舞台？巴西仲有得受讓，必揀讓球客勝。

（周五早上8時開賽，馬會網上文字直播）
阿根廷鋒線傷兵成籮

阿根廷今屆世盃外出師不利，王牌美斯因傷倦勤，另一射手阿古路亦在首仗傷出，結果「潘帕斯雄鷹」火力大減，頭兩仗分別以0比2不敵厄瓜多爾及0比0打和巴拉圭，仲要1球不入認真失威。由於美斯同阿古路未好番而落選，領隊馬天奴今次徵召咗希古恩、泰維斯、拿維斯、安祖哥利亞及保羅戴巴拿五大前鋒入伍，不過後兩者太嫩，希古恩於國家隊發揮極度飄忽，「野獸」更因左膝受傷退隊，令球隊進攻能力死晒火！
金球獎有機做阿二

巴西於主帥鄧加領導下雖踢法悶爆，但勝在防守比阿根廷穩陣，而且今仗有隊長兼進攻核心尼馬坐完波監復出，對人才凋零嘅「森巴兵團」非常重要。尼馬與「大佬」美斯均效力巴塞，「新比利」喺後者因傷缺陣孭重飛搶晒鏡，近8仗轟入10球，包括日前西甲對維拉利爾一控、一挑再轉身窩利抽射嘅金球，技驚四座。雖然美斯重奪下年1月頒發嘅國際足協金球獎幾乎冇懸念，但有傳尼馬憑住近期弗爆演出，有機會力壓皇馬前鋒C朗做「阿二」，趁住呢場兩大南美班霸矚目交鋒，尼馬勢必要以亮麗表現為自己拉票喇。

加上巴西只係多阿根廷兩分排第5，絕對有搶分需要，撞正死對頭咁沉，梗係要趁佢病攞佢命喇，仲有得受讓咁筍，讓球客勝不容錯過。