墨城本「悉」好「大」喜「攻」

猪拉多纳

今日晏晝澳職尾場爆發「大」戰，由墨爾本城主場火併西悉尼流浪者。墨城今季踢法好「大」喜「攻」，連盃賽在內近5仗共轟12球，卻失番12球全數開大，真係入得又失得，撞正大搞「西班牙化」、以進攻為主嘅西悉尼流浪者，癲鳳鬥狂龍格局實多波入，大盤乃不二之選。

（有線64及203台周五下午4時40分直播）

墨爾本城呢班波今季有前冇後、打死罷就，聯賽連澳足盃，近5仗全部開大之餘，總共轟入12球，以箭頭科拿路利為首嘅鋒線火力強大，佢今季聯賽已有5個士哥。可惜墨城卻失番12球，反映出佢哋識攻唔識守，搞到後防風聲鶴唳，因此頻頻同對方大手交易，每仗雙方總入球更達4球或以上，相信短期內踢法好難改變，加上今仗回師主場，必定狂攻。
流浪者近況勇唔驚駁火

西悉尼流浪者大搞「西班牙化」，唔單止崇尚「鬥牛國」地面組織嘅進攻足球風格，仲簽入3位西班牙中場，當中以安特里奧表現最出色，已有2球進帳。西軍亦韌力十足，上仗末段落後1球之下反勝紐卡素噴射機2比1，今仗就算作客都唔驚墨城照駁火。而且兩軍近4次正面交鋒，有3次開出入球大，相信佢哋一開波就會搶攻，大盤可期。除此之外，由於墨城係典型急先鋒，睇番佢哋近3仗都係開賽僅15分鐘內就先開紀錄，踢法非常搶韁，不妨捧埋墨城嘅第一隊入球。