洪禮賢講馬：勇敢小子勢如破竹

纯情小彩迷

　　新正頭跑馬，祝願讀者們橫財就手，龍馬精神，身體健康，事事如意，心境開朗。至於今日賽事，練馬師方面，感覺上大摩和蔡約翰啲馬最有睇頭，要發新年財，應該要靠佢哋。

重心場次

第7場  第二班（100-80分）1600米

　　勇敢小子四場未輸過，由直路賽贏到1400米，呢次考驗在於此程的氣量，並唔係對手級數提升，而可喜在於上場贏來仍大把在手，增強對佢增程的信心。

　    「家家興旺」話晒兩仗前贏緊二班同程，能力有晒證明，加上有個幾月冇跑，儲夠新鮮感，縮程也不怕。「卓爾非凡」上賽臨場呆呆滯滯，落場跑卻是另一回事，轉倉首場已露一手，再出點都有憧憬。「勇者無敵」剛仗明輸冇位上，若不，至少有Ｐ，忽然換人，又唞番夠，大冷在此。「飛躍王子」上場以輕鬆姿態輸近，勿因主帥唔揀，以為係副車。「牛精財星」近績普通，但上場輸在直路被塞，受阻之前其實幾好勢，差唔多係時候現形。

第1場  第五班（40-10分）1400米

　　聚豪精英降到五班打橫行，排埋好檔形勢教埋佢點跑，當然，過去田草表現普通，博Ｗ風險大，ＱＴ膽冷冷哋可博。「自動加速」上場受困仍衝得好，慢熱馬跑到季中狀態應到位。

　    「金寶駿」一連兩場陣上追勢平平，但今次重戴眼罩有變數，始終過去兩Ｗ都有此配件，同埋，磅位突然輕幾多。「翔德」漏閘才斷纜的賽績不用上心，呢場早段多馬走，啱晒發揮。

第2場  第四班（60-40分）1200米

　　松林之星上賽前操練斷過吓，加上出閘反應唔多好，以致演出滑落，估計今場喼得番跑頭，威力會重現。「精英財星」搵啱新出路，一場接一場跑得好，正路腳。

　    「雙辣」一連兩場被臨場情緒影響，加頭罩咩都聽唔到，可能仲好。「豐衣足食」意頭冇得頂，雖然唔知上場點爆，但拉士有馬拍上嚟，隻馬好鬥得，加磅唔多，揀多次。

第3場  第四班（60-40分）1600米

　　芙蓉威龍上賽前已指出唔博定先，下次唔會有賠率，呢次隔晚Ｗ得十幾蚊，贏唔贏得唔知，不過上場唔係塞車點會追唔到則屬實。「喜綵」上場跟得太前，跑法有挑剔之處，那個梗頸四不代表什麼，前仗才是實力指標吧﹗

　    「智友」和「包裝好友」已是除了上述兩駒外，較為揀得上手之馬。「新領袖」剛仗於末段稍有追勢，嚴格來說，唔算好凌厲，兼且直路懶性好重，增程二百米也未必滿足到佢。

第4場  第三班（80-60分）1200米

　　歡樂繽紛七個月冇跑，陣上又曾被撞到失平衡，居然可贏到甩晒，升班減負十磅，哪有阻力可言。「六六精英」只係準，評分和磅頭已甚有壓力，位望機會大啲。

　    「滙名燈」檔好形勢一如上場，三甲分子。「綠續有贏」跑開如果唔增程，未必幫到手，加上十四檔，騎者隨時又順其自然地走晒（早段），有風險。「好新聞」要步速快兼留得好才得米。大冷門博「浚鋒天河」，部署上與廐侶「精英財星」雷同，何況本身在此程起家，此外，成場馬係得佢季內贏過此班咋﹗

第5場  第四班（60-40分）1400米

　　強中傲初出表現唔錯，至少冇太多錯處，估計增程會幫好多。「香檳王」少馬會放的場合啱晒，由短途轉到此程必更啱腳法。「確威星」上場無故擺前走，居然直路唔斷，算佢本事，反映此程韌力冇問題。

　    「電訊巨星」谷草1200米得殿軍的水準，在此未必夠用。「強駒」一檔具天然優勢﹔「松風」只係上場意外地慢閘失準，一對路程好手可拖。

第6場  第三班（80-60分）1400米

　　雅雪休出段段快放到，難度爆晒燈，今場又撞正唔多快馬場合，九檔也未必怕。「安御」剛仗之失係軟顎移位，與實力無關，計番前仗贏「超群如意」好有指標性。

　    「金津好」地莊見盡，重磅點都令能力打折，爭二二三三。「海王子」競爭力和前駒相約。「威海歡騰」差唔多夠火侯，惜今場碰到「雅雪」，未必放得出。「驚喜」陣上不只一次有衝勢，但賽績反覆係事實，睇在隔夜二三十倍分上，拖一注免走雞﹗

第8場  第一班（115-90分）1400米

　　魄力寶拼出勢頭，1400米專家負輕磅，就算對手愈來愈強，仍有再捷本錢。「火箭動力」遇上步速未必快的場合，守好位跑法或事半功倍。

　    「君皇鷹」忠心馬上場只因直路困守，而今場對手實力下降，隨時翻生。「鐵拳」休出慢閘便打亂了發揮，勿介意演出失色，肯換人有決心再拼。「秘密行動」另一陣上使命感好重嘅馬，此程係短，但唔排除會有Ｐ。

第9場  本地二級賽 1800米

　　締造美麗贏經典一哩賽姿態易過人借火，掌握晒成場步速係主因，當然時間好有說服力。今次轉到長途，唔擔心長力，有權再Ｗ。「極品絲綢」按上場贏同程的表現，未必唔夠前駒撼。

　    「魔法幻影」及「美麗傳奇」也是當然之選。「金獅威將」上場仲揀緊，但跑長二百米可能有反效果。「威利旺旺」因禍得福，試到留後追跑法，增程跑1800米仲啱，呢隻最睇唔透。

第10場  第二班（100-80分） 1200米

　　富高勝今季未真正輸過，一出到閘就贏，唔覺得升班會有阻力。「醉味」初次登場可與「虎虎生輝」串Q，實力唔簡單。「光輝出擊」有痰才大敗，隔番一段長時間，點都安全多啲。

　    「xxx之星」累積若干評分升幅才轉場，失勢。「正本仁心」冇內檔隨時又冇影。「賀喜」三檔安全，邊線馬。「加州滿意」還是回到草地賽有把握，不用理會上場泥地賽績。

第11場  第三班（80-60分） 1600米

　　國寶之前已指出，114磅韋達都走去造，剩係嗰份誠意已值回票價，計馬在三班負輕磅亦冇有怕。「大家開心」前仗因賽前工夫唔完整才演出差啲，而上場又見好番，再跟。

　    「天瞳」1400米揀得佢，加程冇理由唔追多次。「馬主精英」跑得番，六十餘分唔會有任何阻力。「心中有程」和「大將風範」各有缺點，限於作配。