洪禮賢講馬：天之驕子換人啱數

纯情小彩迷

　　年初八賽事跑夠十一場，新馬賽七大件，主席短途獎九隻，賭味不強，但又唔係唔好睇，如日前報道過的「金鑾大殿」，係咪一出便會出現solo鏡頭。又例如「蓮華生輝」和「鳥語花香」，今個周日再相遇，對抗性會否比季初短途錦標預賽時唔同，因現時的局面與當日正好相反，一隻贏開，另一隻就唞完，「鳥語花香」能否再次輕勝（應該說夠不夠撼才對），真係幾有疑問﹗﹖

　　呢期韋達停賽，蔡明紹則養傷，柏寶會否獨「寶」天下，望落佢手馬又未必可以出現大手交易，冇錯，當日佢要有頭馬到手唔奇，三兩場也不奇，但講到要連掃多場W則未必嘞﹗當然，「蓮華生輝」係比餐士面更餐士之馬，不用再說，而佢在「下半場」部分坐騎又唔多覺有冠軍相，要打主意，還是「上半場」那批勝望高多少。

近兩仗睇到O咀

　　像第二場五班1600米「天之驕子」，落到五班明知負重，一樣唔配小將，硬要用到阿寶，那份決心甚為明顯，當然，如果有看過此駒近仗表現，睇得出呢隻馬係好受騎，如果陣上騎少步都未必衝得起，所以搵阿寶的確係幾夾。事實上，此駒對上兩仗的演出幾好，如果唔係陣上取位或處理上有挑剔之處，斷唔會到目前仍是三零部隊。像前一場雖然十四檔起步，使唔使沿途四、五叠，轉直路彎還要再兜出啲（也曾被他駒移出影響），欠尺寸的發揮下一樣得殿軍，真係嘥料。到了上賽也不覺跑得好，前中段泊唔到埋去都算嘞，入正直路硬要由中檔移回內檔，嘥時間之餘，仲要自己攞嚟塞車，阻完之後又唔係好騎到，「樁吓樁吓」搖番嚟，依然輸唔遠，隻馬自己幾好heart吓﹗如果咁睇，難怪呢次落班會換人，而跑番此程亦比1400米好衝，應該係時候突破了。